| 虛假有感
話說昨天我交了辭職信，但經理唔肯收，要我再諗清楚。
然後前後兩次講左好多看似係挽留既說話，但言下之意其實有三︰
１．你未夠班
佢既經典對白「翅膀唔夠硬」，出到去一定唔得。
但下午佢又話「無理由翅膀硬左就走左去」我心諗︰究竟我翅膀硬左未﹖
乜都係你講晒～就算未，我可以在第二個地方學習，整硬自己對翅膀囉。
見識到佢既奸狡，我已經覺得係上左最好既一課啦。
２．你冇義氣
佢又話公司未上軌道就走左去，其實係冇咩交帶。
我又心諗︰明知未上軌道，你竟然認為寫字樓冇人都冇問題﹖你冇病吧﹖
既然有個高效率既所謂「金牌秘書」嘛，咁就唔需要我啦，我路過咋～
３．我相信你架
把口話信我，實際上又周圍搵人問長問短，根本就係查我。
乜原來咁樣就係「我相信你架」嗎﹖你唔好再假Ｄ啦﹗
仲叫我下星期每日下午要去ＨＬ所謂「學野」喎，真係想叫佢收皮囉。
其實又係俾佢周圍點去做野，兼且順勢睇實我﹗
夜晚同媽咪講開呢件事，佢話我遇到呢種咁既上司，都係早走早著比較好。
嗯，我都有同感。 |
| |
| 由七月十九日開始到今日，已經係第三日喇，
呢三日都好開心，雖然係來得太快，快得我都唔敢相信，
但我相信呢段關係係可以持久的。
而家最麻煩既問題就係，應唔應該要向公司申報，
根據公司規矩係必須上報，但我和他都唔想，
理由係因為私人事唔想好似攤在陽光下被人知道晒，
真係好想可以低調處理，有乜理由連自己父母都未知道既事，
要被公司其他冇關係既人知道晒﹖我勁唔想呀。
儘管同事同我講︰「記得要申報呀﹗」
但我覺得，仍然有考慮既必要啦。
點解唔同部門拍拖都要申報架﹖癲的﹗ |
| |
| 有位朋友，近來有事發生，原來那個女仔真係咁大影響力，
雖然唔係非常了解佢既情況如何，儘管我見唔到佢，
但識左佢呢幾年，呢次係我頭一次感受到佢既唔開心，
佢亦承認呢陣子真係非常消沉，情緒好低落。
不由自主的，我覺得好心痛，
佢在我心中，一直都係最好的，
真係好唔想睇住佢無朝氣、無衝勁、無心情。
好想好想一直陪住佢渡過呢個低潮期．．．
好想同佢講︰我同佢之間，係唔需要講「多謝」架。
但後來我發現，除左心痛之外，還有「妒忌」既感覺存在～
點解會咁架﹖ |
| |
| 兩極
昨天既心情，就好似南同北咁極端。
開心既係，第一次同阿詩（ＫＥＬＶＩＮ的女朋友）行街，
原來我同佢真係幾投契，好多話題可以傾，大家都有買野～
我買左父親節禮物同埋卡，佢買左好多野，哈哈～
可以多一個朋友行街傾心事，真好～
之後同媽咪出去買左星期六著既外套、鞋，多謝媽咪﹗
呢兩樣都係好開心架～
唔開心既係，下星期一係ＪＯＹＣＥ既ＬＡＳＴ ＤＡＹ喇，
即係由下星期二開始，我會負責晒所有Ｆ＆Ｂ既大小事務，好驚～
以前做漏野、做錯野，都有佢幫我、撐我、提點我，所以我唔怕～
但不久將來，就唔會再有人幫我、撐我、提點我喇，所有事都要自己扛。
而且ＪＯＹＣＥ係我響公司最要好既同事，好似姐姐咁～
呢四個月以來，佢教左我好多野，話我知邊個係好人、邊個要提防。
佢走左，冇人陪我傾偈，而且有事時都唔知可以搵邊個幫我～
我會好寂寞、好孤獨～有種孤軍作戰既感覺．．．
雖然明白人係要向前望，亦替佢有新發展而開心，
不過真係好唔捨得佢走，好唔想佢走呀﹗
而家諗下諗下都已經喊晒，好怕下星期一會忍唔住響公司喊～
得番幾日咋，要學識晒所有野喇，自問我真係對自己冇信心呀～
好怕好怕，壓力好大．．． |
| |
